ନୂଆଦିଲ୍ଲୀ: ସିରିଆରେ ଚାଲିଥିବା ରାଜନୈତିକ ସଙ୍କଟ ମଧ୍ୟରେ ବଡ ଖବର ସାମ୍ନାକୁ ଆସିଛି। ଦାବି ହେଉଛି ଯେ ସିରିଆ ରାଷ୍ଟ୍ରପତି ବସର ଅଲ-ଅସଦଙ୍କ ବିମାନ ଦୁର୍ଘଟଣାଗ୍ରସ୍ତ ହୋଇଥିବା କୁହାଯାଉଛି। ସୂଚନାନୁସାରେ, ତାଙ୍କ ବିମାନ ଆକାଶରେ 500 ମିଟର ଉଚ୍ଚରେ ଖସିପଡିଥିଲା ଏବଂ ଯାହାର ଭଗ୍ନାବଶେଷ ମଧ୍ୟ ଉଦ୍ଧାର କରାଯାଇଥିଲା। ବିମାନଟି ଦୁର୍ଘଟଣା ପୂର୍ବରୁ ରାଡାରରୁ ଅଦୃଶ୍ୟ ହୋଇଯାଇଥିଲା। କୁହାଯାଉଛି ଯେ ସେ ତାଙ୍କ ପରିବାର ସହ ଦେଶ ଛାଡୁଥିବା ବେଳେ ବିମାନଟି ଦୁର୍ଘଟଣାଗ୍ରସ୍ତ ହୋଇଛି। ବିଦ୍ରୋହୀ ଆକ୍ରମଣ ପରେ ସିରିଆ ରାଷ୍ଟ୍ରପତି ବସର ଅଲ-ଅସଦ ତାଙ୍କ ପରିବାର ସହିତ ରାଜଧାନୀ ଦମାସ୍କସ୍କୁ ଛାଡି ପଳାଇଥିଲେ। ସେମାନେ ବିମାନରେ ଯାତ୍ରା କରୁଥିଲେ, କିନ୍ତୁ ବିଦ୍ରୋହୀମାନେ ସେମାନଙ୍କ ବିମାନକୁ ଗୁଳି କରି ଖସାଇ ଦେଇଥିବା କୁହାଯାଉଛି।
ସେପଟେ ଗତ ୨୪ ଘଣ୍ଟା ମଧ୍ୟରେ ବିଦ୍ରୋହୀମାନେ ହୋମ୍ସ ସହରକୁ ଦଖଲ କରିଛନ୍ତି। ହୋମ୍ସରେ ରାଷ୍ଟ୍ରପତି ବସର ଅଲ-ଅସଦଙ୍କ ପିତାଙ୍କ ପ୍ରତିମୂର୍ତ୍ତି ମଧ୍ୟ ଭଙ୍ଗାଯାଇଛି। ଲୋକଙ୍କୁ ସୁରକ୍ଷା ଦେବାରେ ସିରିଆ ସେନା ବିଫଳ ହୋଇଛି। ସେପଟେ ସିରିଆକୁ ସମର୍ଥନ କରୁଥିବା ଦେଶ ରୁଷିଆ, ଇରାନ ଓ ଲେବାନନର ଆତଙ୍କବାଦୀ ସଂଗଠନ ହିଜବୁଲ୍ଲା ମଧ୍ୟ ସିରିଆକୁ ସାହାଯ୍ୟ କରିବାକୁ ଅସମର୍ଥତା ପ୍ରକାଶ କରିଛନ୍ତି। ସେନା ମଧ୍ୟ ଦେଶରୁ ସ୍ଥାନାନ୍ତରିତ ହେବା ଆରମ୍ଭ କରିଛି।
ମିଡ଼ିଆ ରିପୋର୍ଟ ଅନୁଯାୟୀ ବିଦ୍ରୋହୀ ସଂଗଠନ ହୟାତ୍ ତାହିର ଅଲ୍ ଶାମ୍ ଏବେ ସିରିଆକୁ ଦଖଲ କରିଛି। ଏହି ସଙ୍ଗଠନ ସିରିଆ ଏବଂ ରାଜଧାନୀ ଦମାସ୍କସ୍କୁ ଏକଛତ୍ରବାଦୀ ବସର ଅଲ-ଅସଦଙ୍କ କବଳରୁ ମୁକ୍ତ କରିବାକୁ ଘୋଷଣା କରିଛି। ଏହା ସହ ଏକ ନୂଆ ଯୁଗ ଆରମ୍ଭ କରିବାକୁ ଘୋଷଣା କରିଛି। ଏହି ବିଦ୍ରୋହୀ ଗୋଷ୍ଠୀ ଆତଙ୍କବାଦୀ ସଂଗଠନ ଅଲ୍ କାଏଦାର ଏକ ଶାଖା ଥିଲା, କିନ୍ତୁ ୨୦୧୬ରେ ଏହି ଗୋଷ୍ଠୀ ଅଲ୍ କାଏଦାଠାରୁ ନିଜକୁ ଅଲଗା କରିଥିଲା।
ସିରିଆ ପ୍ରଧାନମନ୍ତ୍ରୀ ମହମ୍ମଦ ଗାଜି ଜାଲାଲୀ କହିଛନ୍ତି ଯେ ସେ ଶାନ୍ତିପୂର୍ଣ୍ଣ ଭାବରେ ବିରୋଧୀଙ୍କୁ ଶାସନ ହସ୍ତାନ୍ତର କରିବାକୁ ପ୍ରସ୍ତୁତ ଅଛନ୍ତି। ମୁଁ ମୋର ବାସଭବନରେ ଅଛି ଏବଂ କୌଣସି ସ୍ଥାନକୁ ଯାଇ ନାହିଁ, ଏବଂ ଏହା ମୋର ଦେଶକୁ ଭଲ ପାଏ ବୋଲି ସେ କହିଛନ୍ତି। କାମ କରିବାକୁ ସେ ତାଙ୍କ କାର୍ଯ୍ୟାଳୟକୁ ଯିବେ ଏବଂ ସିରିଆ ନାଗରିକମାନଙ୍କୁ ସର୍ବସାଧାରଣର ସମ୍ପତ୍ତି ନଷ୍ଟ ନ କରିବାକୁ ଅନୁରୋଧ କରିଛନ୍ତି।
