ନୂଆଦିଲ୍ଲୀ: ଘର ଆଗରେ ଟେଣ୍ଟ ବନ୍ଧା ସରିଥିଲା । କାର୍ଡ଼ ବଣ୍ଟା ସରିଥିଲା । ଘରକୁ ଅତିଥି ଆସିବା ଆରମ୍ଭ ହୋଇଯାଇଥିଲା । ଝିଅର ବିବାହ କରିବାକୁ ଜଣେ ଯବାନ ସମସ୍ତ ପ୍ରସ୍ତୁତି ସାରିଥିଲେ । ହେଲେ ଗୋଟେ ମିନିଟ୍ରେ ସବୁକିଛି ଓଲଟପାଲଟ ହୋଇଗଲା । ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଲେ ଯବାନ ବାପା । ଏପରି ସମୟରେ ଦୁଃଖରେ ଭାଙ୍ଗି ପଡ଼ିଥିବା ଝିଅର ସାହାରା ପାଲଟିଲେ ବାପାଙ୍କ ସାଥୀ ଯବାନ । ଧୂମ୍ଧାମ୍ରେ ଝିଅର ବିବାହ କରାଇବା ସହ କନ୍ୟାଦାନ ବି କରାଇଲେ । ଏପରି ଏକ ଦୁଃଖଦ ଓ ହୃଦୟସ୍ପର୍ଶୀ ଘଟଣା ଉତ୍ତରପ୍ରଦେଶର ମଥୁରାର ମାଣ୍ଟରେ ଘଟିଛି ।
ମଥୁରାର ମାର୍ଟ ଥାନା ଅନ୍ତର୍ଗତ ୱାକାଲା ନିବାସୀ ଦେବେନ୍ଦ୍ର ସିଂ । ସେ ଯବାନ ଭାବେ କାମ କରନ୍ତି । ସେ ତାଙ୍କ ଅଲିଅଳି ଝିଅର ବିବାହ ସ୍ଥିର କରିଥିଲେ । ସେଥିଲାଗି ସମସ୍ତ ପ୍ରସ୍ତୁତି ଶେଷ କରିଦେଇଥିଲେ । ହେଲେ ଝିଅର ବିବାହ ଆଉ ମାତ୍ର ଦୁଇଦିନ ବାକିଥିବା ବେଳେ ତାଙ୍କର ଏକ ସଡ଼କ ଦୂର୍ଘଟଣାରେ ମୃତ୍ୟୁ ହେଲା । ଏହି ଦୁର୍ଘଟଣାରେ କାରରେ ଥିବା ଅନ୍ୟ ଦୁଇଜଣଙ୍କର ବି ମୃତ୍ୟୁ ହେଲା । ହେଲେ କିପରି ବିବାହ ହେବ ସେନେଇ ଚିନ୍ତିତ ହୋଇପଡ଼ିଥିଲେ ପରିବାର ଲୋକେ । ଏମିତି କି ଝିଅ ବି ବିବାହ ଆଉ କରିବନି ବୋଲି ରୋକ୍ଠୋକ୍ ମନା କରିଦେଲା । ଶେଷରେ ଏହି ଦୁଃଖଦ ଘଟଣାର ଖବର ପାଇବା ପରେ ମୃତ ଯବାନଙ୍କ ସାଥୀମାନେ ତାଙ୍କ ଘରେ ପହଞ୍ଚିଲେ। ଝିଅକୁ ବୁଝାଶୁଝା କରିବା ସହ ବାପାର କର୍ତ୍ତବ୍ୟ ପାଳନ କରି କନ୍ୟାଦାନ କରିଲେ। ଏହି ବିବାହ ଏବେ ଚର୍ଚ୍ଚାରେ ରହିଛି।
