ନୂଆଦିଲ୍ଲୀ: ହିନ୍ଦୁ ଧର୍ମର ପରମ୍ପରା ଓ ସଂସ୍କୃତିର ଏକ ମହାମେଳା ହେଉଛି କୁମ୍ଭମେଳା । ଏହା ଭାରତ ଉପଖଣ୍ଡର ତ୍ରିବେଣୀ ସଙ୍ଗମଠାରେ ଆୟୋଜିତ ହୁଏ । ପ୍ରତି ୧୨ ବର୍ଷରେ ଥରେ ହୁଏ ଏହି କୁମ୍ଭ ମେଳା । ତେବେ ଏଥର ପ୍ରୟାଗରାଜ ମହାକୁମ୍ଭ ମେଳା ପାଇଁ ଜୋର ସୋରରେ ଚାଲିଛି ପ୍ରସ୍ତୁତି । ଆସନ୍ତା ୧୩ରୁ ଆରମ୍ଭ ହେବ ପ୍ରୟାଗରାଜରେ ଏହି ମହାକୁମ୍ଭ ମେଳା । ଏହା ଫେବୃଆରୀ ୨୬ ତାରିଖ ପର୍ଯ୍ୟନ୍ତ ୪୫ ଦିନ ଧରି ଚାଲିବ । ଏହି କାର୍ଯ୍ୟକ୍ରମରେ ପ୍ରବଳ ଶ୍ରଦ୍ଧାଳୁଙ୍କର ସମାଗମ ହେବ । ତେବେ ଏଥିପାଇଁ ଉଭୟ ରାଜ୍ୟ ଓ କେନ୍ଦ୍ର ସରକାର ପ୍ରମୁଖ ବ୍ୟବସ୍ଥା ଗ୍ରହଣ କରିଛନ୍ତି ।
ଶ୍ରଦ୍ଧାଳୁଙ୍କ ଭିଡ଼କୁ ନିୟନ୍ତ୍ରଣ କରିବା ପାଇଁ ବିଭିନ୍ନ ବ୍ୟବସ୍ଥା କରାଯାଇଛି । କୁମ୍ଭ ମେଳାର ପ୍ରମୁଖ ସ୍ଥାନରେ ୩୪୦ରୁ ଅଧିକ ବିଶେଷଜ୍ଞଙ୍କ ସହ ଆର୍ଟିଫିସିଆଲ ଇଣ୍ଟେଲିଜେନ୍ସ ସହାୟତାରେ ଭିଡ଼ ଉପରେ ନଜର ରଖାଯିବ । ଏଆଇ କ୍ଷମତା ବିଶିଷ୍ଟ ୨୭୦୦ କ୍ୟାମେରା ଲଗାଯିବ ବୋଲି ଜଣାପଡିଛି । ଆକାଶ ମାର୍ଗରୁ ନଜର ରଖିବା ପାଇଁ ହଜାର ହଜାର ସିସିଟିଭି କ୍ୟାମେରା ଏବଂ ଡ୍ରୋନ୍ ମୁତୟନ କରାଯିବ।
୩୫ ମିଟର ଉଚ୍ଚତା ବିଶିଷ୍ଟ, ୩୦ ମିଟର ଓସାର ବିଶିଷ୍ଟ ଅଗ୍ନି ନିର୍ବାପକ କ୍ଷମତା ସମ୍ପନ୍ନ ଚାରୋଟି ଆର୍ଟିକୁଲେଟିଂ ୱାଟର ଟାୱାର (ଏଡବ୍ଲୁଟି) କୁ ନିୟୋଜିତ କରାଯାଇଛି । ଅଗ୍ନି ନିରାପତ୍ତା ବିଭିନ୍ନ ପଦକ୍ଷେପ ପାଇଁ ୧୩୧ କୋଟି ଟଙ୍କାରୁ ଅଧିକ ଆବଣ୍ଟନ କରାଯାଇଛି। ଅଗ୍ନିକାଣ୍ଡ ଘଟଣାକୁ ରୋକିବା ଏବଂ ସୁରକ୍ଷା ବୃଦ୍ଧି ପାଇଁ ଭିଡିଓ ଏବଂ ଥର୍ମାଲ୍ ଇମେଜିଂ ସିଷ୍ଟମ୍ ସମେତ ଉନ୍ନତ ପ୍ରଯୁକ୍ତିବିଦ୍ୟା ସହିତ ଏ.ଡବ୍ଲ୍ୟୁ.ଟି.ଗୁଡ଼ିକ ସଜ୍ଜିତ ହୋଇଛି। ପ୍ରଥମ ଥର ପାଇଁ, ୧୦୦ମିଟର ପର୍ଯ୍ୟନ୍ତ ଡାଇଭ୍ କରିବାରେ ସକ୍ଷମ ଅଣ୍ଡରୱାଟର ଡ୍ରୋନ୍ ସଙ୍ଗମ ଅଞ୍ଚଳରେ ଦିନରାତି ପହରା ପ୍ରଦାନ କରିବ। ୫୬ଜଣ ସାଇବର ବିଶେଷଜ୍ଞଙ୍କ ଏକ ଦଳ ଅନଲାଇନ ବିପଦ ଉପରେ ନଜର ରଖିବେ। ସମସ୍ତ ଥାନାରେ ସାଇବର ହେଲ୍ପ ଡେସ୍କ ସ୍ଥାପନ କରାଯାଉଛି।
ସେହିପରି ପୋଲିସ ଅଧିକାରୀମାନେ ଘୋଡ଼ାରେ ବସି ଭିଡ଼କୁ ନିୟନ୍ତ୍ରଣ କରିବେ । ସୁରକ୍ଷା ଏବଂ ବିପର୍ଯ୍ୟୟ ପ୍ରସ୍ତୁତିକୁ ବୃଦ୍ଧି କରିବା ପାଇଁ ଏକ ଅତ୍ୟାଧୁନିକ ବହୁ-ବିପର୍ଯ୍ୟୟ ମୁକାବିଲା ଯାନ ନିୟୋଜିତ କରାଯାଇଛି। ଏହା ପ୍ରାକୃତିକ ବିପର୍ଯ୍ୟୟ ଠାରୁ ଆରମ୍ଭ କରି ସଡ଼କ ଦୁର୍ଘଟଣା ପର୍ଯ୍ୟନ୍ତ ପରିସ୍ଥିତିର ମୁକାବିଲା କରିବାରେ ସକ୍ଷମ। ଏଥିରେ ୧୦ ରୁ ୨୦ ଟନ୍ କ୍ଷମତା ବିଶିଷ୍ଟ ଏକ ଲିଫ୍ଟିଂ ବ୍ୟାଗ୍ ଅନ୍ତର୍ଭୁକ୍ତ, ଯାହା ଭଗ୍ନାବଶେଷ ତଳେ ଚାପି ହୋଇ ରହିଥିବା ଲୋକଙ୍କୁ ଉଦ୍ଧାର କରିବାରେ ସକ୍ଷମ। ଏଥିରେ ୧.୫ ଟନ୍ ପର୍ଯ୍ୟନ୍ତ ଓଜନର ଭାରୀ ଜିନିଷ ଉଠାଇବା ଏବଂ ଘୁଞ୍ଚାଇବା ପାଇଁ ସ୍ୱତନ୍ତ୍ର ମେସିନ୍ ସାମିଲ ରହିଛି । ବାସ୍ତବ ସମୟରେ ନଜର ରଖିବା ପାଇଁ ଏଆଇ କ୍ଷମତା ବିଶିଷ୍ଟ ୨୭୦୦ କ୍ୟାମେରା ନିୟୋଜିତ କରାଯାଇଛି । ପାଣିତଳେ ନିୟୋଜିତ ହେବାକୁ ଥିବା ଡ୍ରୋନ ୧୦୦ ମିଟର ପର୍ଯ୍ୟନ୍ତ ଗଭୀର ସ୍ଥାନକୁ ଅନୁଧ୍ୟାନ କରିପାରିବ । ୫୦ ହଜାରରୁ ଅଧିକ ଅର୍ଦ୍ଧସାମରିକ ବଳ ମେଳା ସ୍ଥଳରେ ନିୟୋଜିତ ରହିବେ ।
