ମୁମ୍ବାଇ: ଜିତିଲେ ପ୍ରଥମେ ସବୁ ଅବିବାହିତ ଯୁବକଙ୍କ ବିବାହ କରାଇଦେବି । ଭୋଟରଙ୍କୁ ଆକୃଷ୍ଟ କରିବା ପାଇଁ ଏପରି ପ୍ରତିଶ୍ରୁତି ଦେଇଛନ୍ତି ଜଣେ ବିଧାୟକପ୍ରାର୍ଥୀ । ଏହାକୁ ଶୁଣି ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି । ଏବେ ଏହାକୁ ନେଇ ଚର୍ଚ୍ଚା ଜୋର ଧରିଛି । ଆଗକୁ ରହିଛି ମହାରାଷ୍ଟ୍ର ନିର୍ବାଚନ । ଭୋଟରଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ଦଳର ପ୍ରାର୍ଥୀମାନେ ଭିନ୍ନ ଭିନ୍ନ ପ୍ରତିଶ୍ରୁତି ଦେବାରେ ଲାଗିଛନ୍ତି । ତେବେ ଏବେ ବିଡ୍ ଜିଲ୍ଲାର ପାର୍ଲି ବିଧାନସଭା ନିର୍ବାଚନ ମଣ୍ଡଳୀରୁ ଜାତୀୟତାବାଦୀ କଂଗ୍ରେସ ପାର୍ଟି (ଶରଦ ପାୱାର ଗୋଷ୍ଠୀ) ପ୍ରାର୍ଥୀ ରାଜେସାହେବ ଦେଶମୁଖ ଏପରି ପ୍ରତିଶ୍ରୁତି ଦେଇ ଚର୍ଚ୍ଚାକୁ ଆସିଛନ୍ତି ।
ସେ କହିଛନ୍ତି , ଯଦି ସେ ନିର୍ବାଚନ ଜିତିବେ, ତେବେ ତାଙ୍କ ନିର୍ବାଚନମଣ୍ଡଳୀରେ ଥିବା ସବୁ ଅବିବାହିତମାନଙ୍କ ବିବାହ କରାଇଦେବେ । ଯୁବକମାନଙ୍କୁ ରୋଜଗାର ଦେବା ତାଙ୍କର ପ୍ରାଥମିକ ଲକ୍ଷ୍ୟ ହେବ । ଯେତେବେଳେ ଲୋକମାନେ ଜଣେ ଭଲ ଜୀବନସାଥୀ ଚାହାଁନ୍ତି, ସେମାନଙ୍କୁ ଚାକିରି ମିଳିବା ଜରୁରୀ । ତାଙ୍କ ପ୍ରତିଶ୍ରୁତି ଗ୍ରାମାଞ୍ଚଳରେ ଏକ ଗମ୍ଭୀର ସମସ୍ୟାକୁ ଆଲୋକପାତ କରିଛି। ଆଜିକାଲି ଅନେକ ଯୁବକ ଚାକିରି କିମ୍ବା ବ୍ୟବସାୟ ନଥିବାରୁ ବିବାହରେ ଅସୁବିଧାର ସମ୍ମୁଖୀନ ହେଉଛନ୍ତି। ବିଶେଷ କରି ଯେଉଁମାନେ ବିବାହ ପାଇଁ କନ୍ୟା ଖୋଜୁଛନ୍ତି ସେମାନଙ୍କ ପାଇଁ ଏହି ସମସ୍ୟା ଆହୁରି ବଢିଯାଇଥାଏ । ତାଙ୍କ ପ୍ରତିଦ୍ୱନ୍ଦ୍ୱୀ ତଥା ରାଜ୍ୟର କୃଷି ମନ୍ତ୍ରୀ ଧନଞ୍ଜୟ ମୁଣ୍ଡେ ତାଙ୍କ ନିର୍ବାଚନ ମଣ୍ଡଳୀକୁ କୌଣସି ଶିଳ୍ପ ଆଣିବାରେ ସକ୍ଷମ ହୋଇନଥିବାରୁ ଏଠାକାର ଯୁବକମାନଙ୍କୁ ରୋଜଗାରରୁ ବଞ୍ଚିତ କରାଯାଉଛି ବୋଲି ସେ ଅଭିଯୋଗ କରିଛନ୍ତି।
