ୱାସିଂଟନ୍: ଦିନକୁ ଦିନ ବଢ଼ିବାରେ ଲାଗିଛି ଲସ୍ ଏଞ୍ଜେଲସ୍ ନିଆଁ। ଦିନକୁ ଦିନ ନିଆଁ ବଢ଼ିବା ସହ ବଢ଼ିବାରେ ଲାଗିଛି ମୃତ୍ୟୁ ସଂଖ୍ୟା। ନିଆଁ ପ୍ରକୋପରେ ସବୁ ଯେମିତି ଛାରଖାର ହୋଇଯାଇଛି। ଅଗ୍ନିଶମ ବାହିନୀ ନିଆଁକୁ ଲିଭାଇବାରେ ଲାଗିଥିଲେ ମଧ୍ୟ କୌଣସି ଫାଇଦା ହେଉନି। ଆମେରିକା କାଲିଫର୍ଣ୍ଣିଆରେ ଭୟଙ୍କର ଭାବେ ବ୍ୟାପୁଛି ଜଙ୍ଗଲ ନିଆଁ । ଗୋଟେପଟେ ଲସ୍ ଏଞ୍ଜେଲସ୍ର ୨ଟି ଜଙ୍ଗଲରୁ ନିଆଁ ଲିଭାଯାଇଥିବା ବେଳେ ସେପଟେ ଆଉ ୨ଟି ଜଙ୍ଗଲକୁ ବ୍ୟାପିଛି ନିଆଁ । ଜଙ୍ଗଲ ନିଆଁରେ ପୋଡ଼ି ହୋଇ ମୃତ୍ୟୁସଂଖ୍ୟା ୨୪କୁ ବୃଦ୍ଧି ପାଇଛି । ଏଯାବତ୍ ପ୍ରାୟ ତିନି ଲକ୍ଷରୁ ଅଧିକ ଲୋକ ସ୍ଥାନାନ୍ତର ହେଲେଣି । ତୀବ୍ର ସାଣ୍ଟା ଏନା ପବନ ଯୋଗୁଁ ନିଆଁ ଭୟଙ୍କର ରୂପ ନେଇଛି, ଯାହା ୧୨,୦୦୦ ରୁ ଅଧିକ କୋଠାକୁ ଧ୍ୱଂସ କରିଦେଇଛି। ଏହି ଅଗ୍ନିକାଣ୍ଡ ସାନ ଫ୍ରାନ୍ସିସ୍କୋ ଠାରୁ ବଡ଼ ଅଞ୍ଚଳକୁ ପୋଡ଼ି ପାଉଁଶ କରିଦେଇଛି।
ବର୍ତ୍ତମାନ ଲସ୍ ଏଞ୍ଜେଲସ୍ ଆଖପାଖ ଅଞ୍ଚଳରେ ନିଆଁ ଜଳୁଛି, ଯେଉଁଥିରେ ଇଟନ୍, ହର୍ଷ୍ଟ, କେନେଥ୍ ଏବଂ ପାଲିସାଡେସ୍ ଅଗ୍ନିକାଣ୍ଡ ସମେତ ଅନ୍ୟୁନ ୪ଟି ବଡ଼ ଅଗ୍ନିକାଣ୍ଡ ଘଟିଛି, ଯାହା ପ୍ରାୟ ୩୮,୨୭୬ ଏକର ଜମିରେ ବ୍ୟାପିଛି। ୨ଟି ନିଆଁକୁ ଆୟତ୍ତ କରାଯାଇଥିବା ସୂଚନା ମିଳିଛି। ଅନ୍ୟପଟେ ଆସନ୍ତା ବୁଧବାର ପର୍ଯ୍ୟନ୍ତ ପ୍ରବଳ ପବନ ବହିବାର ପୂର୍ବାନୁମାନ କରିଛି ପାଣିପାଗ ବିଭାଗ । ଫଳରେ ନିଆଁ ଆହୁରି ବ୍ୟାପିପାରେ ବୋଲି ଆଶଙ୍କା ପ୍ରକାଶ ପାଇଛି। ନିଆଁକୁ ଆୟତ୍ତ କରିବା ପାଇଁ ଅଗ୍ନିଶମ ବାହିନୀ ସଂଘର୍ଷ ଜାରି ରଖିଛନ୍ତି।
ଗତ ମଙ୍ଗଳବାର ଅର୍ଥାତ ଜାନୁଆରୀ ୭ରୁ ଆରମ୍ଭ ହୋଇଥିବା ଏହି ଅଗ୍ନିକାଣ୍ଡ ପାଲିସାଡେସ୍, ଇଟନ୍, କେନେଥ୍ ଏବଂ ହର୍ଷ୍ଟ ଅଞ୍ଚଳରେ ପ୍ରାୟ ୧୬୦ ବର୍ଗ କିଲୋମିଟର ନଷ୍ଟ କରିଦେଇଛି। କାଲ୍ ଫାୟାର ଅନୁଯାୟୀ, ପାଲିସାଡେସ୍ ଅଗ୍ନି କେବଳ ୧୧ ପ୍ରତିଶତ ଏବଂ ଇଟନ୍ ଅଗ୍ନି ୨୭ ପ୍ରତିଶତ ନିୟନ୍ତ୍ରଣ କରାଯାଇଛି। PowerOutage.us ରିପୋର୍ଟ ଅନୁସାରେ, ୭୦,୦୦୦ ରୁ ଅଧିକ ଲୋକ ବିଦ୍ୟୁତ୍ ବିନା ଅଛନ୍ତି, ସେମାନଙ୍କ ମଧ୍ୟରୁ ଅଧିକାଂଶ ଲସ୍ ଆଞ୍ଜେଲସ୍ କାଉଣ୍ଟିରେ ଅଛନ୍ତି।
ଯଦିଓ ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ଜଣାପଡ଼ି ନାହିଁ, ପ୍ରାରମ୍ଭିକ ଆକଳନରୁ ଜଣାପଡ଼ୁଛି ଯେ ଏହା ଆମେରିକା ଇତିହାସର ସବୁଠାରୁ ମହଙ୍ଗା ଅଗ୍ନିକାଣ୍ଡ ଦୁର୍ଘଟଣା ହୋଇପାରେ। AccuWeather ତଥ୍ୟ ଅନୁଯାୟୀ, ଅଗ୍ନିକାଣ୍ଡ ଯୋଗୁଁ ୧୩୫ ରୁ ୧୫୦ ବିଲିୟନ ଆର୍ôଥକ କ୍ଷତି ହେବ ବୋଲି ଆକଳନ କରାଯାଇଛି।
ଅଗ୍ନିକାଣ୍ଡରେ ବିଲି କ୍ରିଷ୍ଟାଲ୍ ଏବଂ ମାଣ୍ଡି ମୁର୍ ସମେତ ଅନେକ ସେଲିବ୍ରିଟିଙ୍କ ଘର ନଷ୍ଟ ହୋଇଯାଇଛି। ଏହା ସହିତ, ମସଜିଦ, ସିନାଗୋଗ୍ ଏବଂ ଚର୍ଚ୍ଚ ସମେତ ଅନେକ ପୂଜାସ୍ଥଳ ମଧ୍ୟ ଆକ୍ରମଣର ଶିକାର ହୋଇଛି।
୩୩୫ଟି ସ୍କୁଲ ବନ୍ଦ ହୋଇଯାଇଛି, ଏବଂ ନେତୃତ୍ୱ ବିଫଳତା ପାଇଁ ମେୟର କରେନ ବାସ୍ ସମାଲୋଚନାର ଶିକାର ହେଉଛନ୍ତି। କାଲିଫର୍ନିଆ ରାଜ୍ୟପାଳ ଗାଭିନ୍ ନ୍ୟୁସମ୍ ରାଜ୍ୟ ଅଧିକାରୀମାନଙ୍କୁ ଜଳଭଣ୍ଡାର ଏବଂ ହାଇଡ୍ରାଣ୍ଟଗୁଡ଼ିକରେ ପାଣି କାହିଁକି କମ୍ ପଡୁଛି ତାହାର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
