ନୂଆଦିଲ୍ଲୀ: ଯଦି ମା’ ତା ପିଲା ପାଇଁ ଦେବୀ ହୋଇ ସବୁକିଛି କରିପାରୁଛି । ତେବେ ପିଲା କାଇଁ ନୁହେଁ। ପିଲା ମଧ୍ୟ ମା’, ବାପାଙ୍କୁ ଖୁସି ଦେବା ପାଇଁ ସବୁକିଛି କରିବାକୁ ପ୍ରସ୍ତୁତ ରହଛନ୍ତି। ଏବେ ପ୍ରୟାଗରାଜରେ ମହାକୁମ୍ଭ ମେଳା ଚାଲିଛି। ଏଠାରେ ବୁଡ଼ ପକାଇଲେ ସମସ୍ତ ପାପ ଧୋଇ ହୋଇଯାଏ ବୋଲି ବିଶ୍ୱାସ ଅଛି। ଏଠାରେ ବୁଡ଼ ପକାଇବା ପାଇଁ କାହିଁ କେତେ ଦୂରରୁ ଲୋକେ ଏଠାକୁ ଆସୁଛନ୍ତି। ଜଣେ ୯୨ ବର୍ଷିୟ ମା’ଙ୍କୁ ନେଇ ପୁଅ ବାହାରିଛନ୍ତି ମହାକୁମ୍ଭ। ଆପଣମାନେ ଭାବୁଥିବେ ଏଥିରେ ବଡ଼ କଥା କ’ଣ।
ଆଜ୍ଞା ଏଥିରେ ସବୁଠୁ ବଡ଼ କଥା ହେଲା ବଳଦଗାଡ଼ିରେ ୯୨ ବର୍ଷିୟ ମା’କୁ ନେଇ ପୁଅ ବାହାରିଛି କୁମ୍ଭମେଳା। ସେ ପୁଣି ସେହି ଗାଡ଼ିକୁ କେହି ଟାଣୁ ନାହାଁନ୍ତି ପୁଅ ନିଜେ ହିଁ ଏହି ଗାଡ଼ି ଟାଣି ଚାଲି ଚାଲି ମା’ଙ୍କୁ ମହାକୁମ୍ଭରେ ପହଞ୍ଚାଇ ବୁଡ଼ ପକାଇବାକୁ ଶପଥ ନେଇଛି।
ମୁଜାଫରନଗରର ବୁଲନ୍ଦସହରର ବାସିନ୍ଦା ୬୫ ବର୍ଷୀୟ ଚୌଧୁରୀ ସୁଦେଶ ପାଲ ମଲିକ ତାଙ୍କ ୯୨ ବର୍ଷୀୟ ମାଆଙ୍କ ସହିତ ଗଙ୍ଗାରେ ସ୍ନାନ କରିବା ପାଇଁ ପ୍ରୟାଗରାଜ କୁମ୍ଭକୁ ନେବା ପାଇଁ ଏକ ବଳଦ ଗାଡ଼ିରେ ବାହାରିଛନ୍ତି। ବିଶେଷ କଥା ହେଉଛି ସେ ନିଜେ ବଳଦ ଗାଡ଼ି ଟାଣୁଛନ୍ତି।
ସୁଦେଶ ପାଲ କହିଥିଲେ ଯେ ୨୫ ବର୍ଷ ପୂର୍ବେ ତାଙ୍କର ଆଣ୍ଠୁ କ୍ଷତିଗ୍ରସ୍ତ ହୋଇଥିଲା ଏବଂ ତାଙ୍କୁ ଚାଲିବାରେ ବହୁତ ଅସୁବିଧା ହେଉଥିଲା। ତାଙ୍କ ମାଆଙ୍କ ଆଶୀର୍ବାଦରେ ତାଙ୍କ ଆଣ୍ଠୁ ସୁସ୍ଥ ହୋଇଗଲା। ଏହି ଋଣ ପରିଶୋଧ କରିବା ପାଇଁ, ସେ ତାଙ୍କ ମାଆଙ୍କୁ କୁମ୍ଭରେ ସ୍ନାନ କରାଇବା ପାଇଁ ପ୍ରତିଜ୍ଞା କରିଥିଲେ। ତାଙ୍କର ଯାତ୍ରା ୧୩ ଦିନ ମଧ୍ୟରେ ସମାପ୍ତ ହେବ। ସେ ବୁଲନ୍ଦସହରରେ ପହଞ୍ଚିବା ମାତ୍ରେ ସ୍ଥାନୀୟ ଲୋକମାନେ ତାଙ୍କୁ ସ୍ୱାଗତ କରିବା ପାଇଁ ଏକାଠି ହୋଇଥିଲେ। ପୁଅଟି ବଳଦ ଗାଡି ଟାଣୁଥିବାବେଳେ ମାଆ ପଛରେ ବସିଥିବା ଦେଖି, ଅଞ୍ଚଳର ଲୋକମାନେ ସେମାନଙ୍କୁ ବହୁତ ପ୍ରଶଂସା କରିଛନ୍ତି। ଏହି ଅନନ୍ୟ ଦୃଶ୍ୟ ଆଜିର ସମୟରେ ମା ଏବଂ ପୁଅଙ୍କ ମଧ୍ୟରେ ପବିତ୍ର ସମ୍ପର୍କ ଏବଂ ଭକ୍ତିର ଏକ ଅନନ୍ୟ ଉଦାହରଣ ପାଲଟିଛି।
