ଥିରୁଭାନନ୍ଥପୁରମ୍ : ସାବିତ୍ରୀ ନିଜ ସ୍ୱାମୀଙ୍କୁ ଯମଙ୍କ ପାଖରୁ ଫେରାଇ ଆଣିଥିଲେ । ଏହା ସମସ୍ତେ ଜାଣନ୍ତି । ହେଲେ ନିକଟରେ ଜଣେ ମହିଳା ନିଜ ସ୍ୱାମୀଙ୍କୁ ୪୦ ଫୁଟ୍ କୂଅରୁ ଉଦ୍ଧାର କରି ଚର୍ଚ୍ଚାକୁ ଆସିଛନ୍ତି । ଏହାର ଫଟୋ ଓ ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ମହିଳାଙ୍କ ଏପରି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି । ଏପରି ଘଟଣା ଦେଖିବାକୁ ମିଳିଛି କେରଳରେ ।
କେରଳର ଏର୍ନାକୁଲମ୍ ଜିଲାର ପିରାଭୋମ୍ ମ୍ୟୁନିସିପାଲିଟି ଅଞ୍ଚଳରେ ରୁହନ୍ତି ୬୪ ବର୍ଷୀୟ ଅବସରପ୍ରାପ୍ତ ପୋଲିସ ଅଫିସର ରାମେସାନ୍ । ନିକଟରେ ସେ ନିଜ ଘର ଅଗଣାରେ ଥିବା ଗଛରୁ ଗୋଲମରିଚ ତୋଳୁଥିଲେ । ନିଜର ଅସାବଧାନତା ଯୋଗୁ ସେ ପାଖରେ ଥିବା କୂଅରେ ଖସିପଡ଼ିଥିଲେ। ଏହା ଦେଖି ତାଙ୍କ ସ୍ତ୍ରୀ ପଦ୍ମମ୍ ତାଙ୍କୁ ଉଦ୍ଧାର କରିବାକୁ ସଙ୍ଗେ ସଙ୍ଗେ ୪୦ ଫୁଟ୍ ଗଭୀର କୂୁଅରେ ପଶିଯାଇଥିଲେ ।
ପଦ୍ମମ୍ ପ୍ରଥମେ ପ୍ଲାଷ୍ଟିକ୍ ଦଉଡ଼ି କୂଅକୁ ପକାଇଥିଲେ । ହେଲେ ତାହା କାମ କରି ନ ଥଲା। ସେ ଅଗ୍ନିଶମ ବିଭାଗକୁ ଖବର ଦେବା ସହ ପଡୋଶୀଙ୍କୁ କହି କୂଅ ମଧ୍ୟକୁ ପଶିଯାଇଥିଲେ। କୂଅରେ ପ୍ରାୟ ୫ ଫୁଟ୍ରୁ ଅଧିକ ଉଚ୍ଚତାର ପାଣି ଥିଲା। ପଦ୍ମମ୍ କୂଅ କାନ୍ଥରୁ ନଇଁରହି ସ୍ୱାମୀଙ୍କୁ ଛିଡ଼ାହୋଇ ରହିବାରେ ସାହାଯ୍ୟ କରିଥିଲେ । ଖବରପାଇ ତୁରନ୍ତ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଦଉଡ଼ି ଓ ଜାଲ ସହାୟତାରେ ଉଦ୍ଧାର କରିଥିଲେ। ଆହତ ହୋଇଥିବାରୁ ଉଭୟଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ପଦ୍ମମ୍ଙ୍କ ଦୁଃସାହସିକତାକୁ ସୋସିଆଲ ମିଡିଆରେ ଉଚ୍ଚ ପ୍ରଶଂସା କରାଯାଇଛି। ତାଙ୍କର ତ୍ୱରିତ୍ ନିଷ୍ପତ୍ତି ଏବଂ ନିର୍ଭୀକ ପଦକ୍ଷେପକୁ ଅନେକ ଭୂୟସୀ ପ୍ରଶଂସା କରିଛନ୍ତି।
