ନୂଆଦିଲ୍ଲୀ: ସରିଗଲାଣି ଦୀପାବଳି, ହେଲେ ପରିସ୍ଥିତିରେ ଆସୁନି ସୁଧାର । ଦୀପାବଳି ପରଠାରୁ ଦିନକୁ ଦିନ ବିଗିଡ଼ିବାରେ ଲାଗିଛି ବାୟୁର ଗୁଣବତ୍ତାର ମାନ । ବୁଧବାର ସକାଳୁ ଦିଲ୍ଲୀର ବାୟୁଅତି ଖରାପ ଥିବା କୁହାଯାଉଛି ।
ଘନ କୁହୁଡି ଓ ପ୍ରଦୂଷଣ କାରଣରୁ ଅସ୍ତବ୍ୟସ୍ତ ହୋଇପଡିଛନ୍ତି ରାଜଧାନୀବାସୀ । ପାରଦର ହ୍ରାସ କାରଣରୁ ଥଣ୍ଡାର ପ୍ରକୋପ ବଢିବାରେ ଲାଗିଛି ଏହା ସହ ପ୍ରଦୂଷଣର ମାତ୍ରା ମଧ୍ୟ ବୃଦ୍ଧି ପାଉଛି । ଯୁଆଡେ ଦେଖିଲେ ଖାଲି ଧୂଆଁମୟ ପରିବେଶ ।ବୁଧବାର ସକାଳୁ ଦିଲ୍ଲୀ-ଏନସିଆର୍, ଉତ୍ତରପ୍ରଦେଶ ଏବଂ ପଞ୍ଜାବ ସମେତ ଉତ୍ତର ଭାରତର ଅଧିକାଂଶ ଅଞ୍ଚଳରେ ଭୟଙ୍କର କୁହୁଡ଼ି ଦେଖିବାକୁ ମିଳିଛି । ଫଳରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଦିଲ୍ଲୀବାସୀ । ବିଶେଷ କରି ଗାଡି ଚଳାଚଳରେ ବାଧା ପ୍ରାପ୍ତ ହେଉଛି । ଖଣ୍ଡେ ବାଟ ଯାଏଁ କିଛି ବି ଦୃଶ୍ୟମାନ ହେଉନାହିଁ । ଯେଉଁକାରଣରୁ ଦୁର୍ଘଟଣା ହେବାର ଆଶଙ୍କା ବୃଦ୍ଧି ପାଉଛି ।
ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ମଙ୍ଗଳବାର ସନ୍ଧ୍ୟାରେ ୩୧୬ ରହିଥିବା ବେଳେ ବୁଧବାର ସକାଳେ ୩୬୧ରହିଛି। ରାଜଧାନୀର ଅନେକ ଅଞ୍ଚଳରେ ୩୦୦ରୁ ଅଧିକ ଏକ୍ୟୁଆଇ ରେକର୍ଡ କରାଯାଇଛି।
ସେଣ୍ଟ୍ରାଲ୍ ପ୍ରଦୂଷଣ କଣ୍ଟ୍ରୋଲ୍ ବୋର୍ଡ (ସିପିସିବି) ତଥ୍ୟ ଅନୁଯାୟୀ, ଆୟା ନାଗରରେ ବୁଧବାର ସକାଳ ୮ଟାରେ ୪୧୭ ଏକ୍ୟୁଆଇ ରେକର୍ଡ ହୋଇଛି। ଯାହାକି ସହରର ସବୁଠାରୁ ଖରାପ ବାୟୁ ଗୁଣବତ୍ତା ବୋଲି ଜାଣିବାକୁ ମିଳିଛି।
ତେବେ ଦିଲ୍ଲୀର ଅଧିକାଂଶ ଅଞ୍ଚଳରେ ବାୟୁ ଗୁଣବତ୍ତା ୩୦୦ରୁ ଅଧିକ ରହିଛି। ବୁଧବାର ସକାଳେ ଘନ କୁହୁଡ଼ି ସହରକୁ ଘେରି ରହିଥିବା ବେଳେ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦର ସମେତ ଦିଲ୍ଲୀର ଅନେକ ଅଞ୍ଚଳରେ ଦୃଶ୍ୟମାନତା ହ୍ରାସ ପାଇଛି।
ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦର ଏକ ପରାମର୍ଶଦାତା ଜାରି କରି କହିଛି ଯେ କୁହୁଡି ଯୋଗୁଁ ସିଏଟି ୩ ପାଳନ କରୁନଥିବା ବିମାନ ପ୍ରଭାବିତ ହେବ।
