ମୁମ୍ବାଇ : ମାତ୍ର ୧୮ ବର୍ଷ ବୟସରେ ମିସ୍ ୟୁନିଭର୍ସର ମୁକୁଟ ପିନ୍ଧିଥିଲେ ବଲିଉଡ଼ ଅଭିନେତ୍ରୀ ସୁସ୍ମିତା ସେନ୍ । ଏବେ ସେ ବଲିଉଡର ଜଣାଶୁଣା ଅଭିନେତ୍ରୀ ତଥା ଫ୍ୟାଶନ ଆଇକନ ଭାବେ ପରିଚିତ । ସେ ନିଜର ବ୍ୟକ୍ତିଗତ ଓ ବୃତ୍ତିଗତ ଜୀବନକୁ ନେଇ ଅଧିକାଂଶ ସମୟ ଚର୍ଚ୍ଚାରେ ରହିଥାନ୍ତି । ତେବେ ଆଜି ୪୯ ବର୍ଷରେ ପାଦ ଦେଇଛନ୍ତି ସୁସ୍ମିତା । ଏହି ଅବସରରେ ତାଙ୍କ ନିକଟକୁ ଫ୍ୟାନ୍ସଙ୍କଠାରୁ ଆରମ୍ଭ କରି ସେଲିବ୍ରିଟିଙ୍କ ପର୍ଯ୍ୟନ୍ତ ସମସ୍ତଙ୍କଠାରୁ ଛୁଟୁଛି ଶୁଭେଚ୍ଛାର ସୁଅ ।
୧୯୭୫ ମସିହା ଆଜିର ଦିନରେ ହାଇଦ୍ରାବାଦରେ ଜନ୍ମଗ୍ରହଣ କରିଥିଲେ ସୁସ୍ମିତା ସେନ । ତାଙ୍କ ପିତା ବାୟୁସେନାରେ କମାଣ୍ଡର ଥିବା ବେଳେ ମାଆ ଜୁଏଲେରୀ ଡିଜାଇନର ଥିଲେ । ତେବେ ୧୯୯୪ରେ ସୁସ୍ମିତା ସେନ ମିସ ଇଣ୍ଡିଆ ଓ ମିସ୍ ୟୁନିଭର୍ସର ଟାଇଟଲ ହାତେଇଥିଲେ । ସେହି ସମୟରେ ମାତ୍ର ତାଙ୍କୁ ୧୮ ବର୍ଷ ବୟସ ହୋଇଥିଲା । ସୁସ୍ମିତା ସେନଙ୍କୁ ଭାରତର ପ୍ରଥମ ମହିଳା ମିସ୍ ୟୁନିଭର୍ସ ଆଖ୍ୟା ମଧ୍ୟ ଦିଆଯାଇଛି। ତେବେ ୧୯୯୪ ମସିହାରେ ଯେତେବେଳେ ମିସ୍ ଇଣ୍ଡିଆ ପ୍ରତିଯୋଗିତା ଚାଲିଥିଲା । ସେତେବେଳେ ଉଭୟ ସୁସ୍ମିତା ସେନ୍ ଏବଂ ଐଶ୍ୱର୍ଯ୍ୟା ରାୟ ଫାଇନାଲିଷ୍ଟ ହୋଇଥିଲେ। କୁହାଯାଏ ଯେ ଅନ୍ତିମ ରାଉଣ୍ଡରେ ଉଭୟ ଐଶ୍ୱର୍ଯ୍ୟା ଏବଂ ସୁସ୍ମିତା ୯.୩୩ ମାର୍କ ହାସଲ କରିଥିଲେ ।
ଏହା ପରେ ବିଚାରପତିମାନେ ନିଷ୍ପତ୍ତି ନେଇଥିଲେ ଯେ ପ୍ରତ୍ୟେକଙ୍କୁ ଗୋଟିଏ ପ୍ରଶ୍ନ ପଚରାଯିବ ଏବଂ ସଠିକ୍ ଉତ୍ତର ଥିବା ବ୍ୟକ୍ତିଙ୍କୁ ବିଜେତା ଘୋଷିତ କରାଯିବ। ସୁସ୍ମିତା ସେନଙ୍କୁ ଏକ ପ୍ରଶ୍ନ ପଚରାଯାଇଥିଲା, ତୁମେ ତୁମର ଦେଶର ବୟନ ଐତିହ୍ୟ ବିଷୟରେ କିଛି ଜାଣିଛ କି? ଏହା କେବେ ଆରମ୍ଭ ହେଲା? ଏବଂ ଆପଣ କ’ଣ ପିନ୍ଧିବାକୁ ପସନ୍ଦ କରିବେ? ସୁସ୍ମିତା ଏହି ପ୍ରଶ୍ନଗୁଡିକର ସଠିକ୍ ଉତ୍ତର ଦେଇ ମିସ୍ ୟୁନିଭର୍ସର ମୁକୁଟ ଜିତିଥିଲେ । ସେହିପରି ୨୦୧୪ରେ ସୁସ୍ମିତା ସେନ୍ ଅଟୋଇମ୍ୟୁନ ଆଡିସନ୍ ରୋଗରେ ଆକ୍ରାନ୍ତ ହୋଇଥିଲେ। ଏଥିପାଇଁ ଷ୍ଟେରୋଏଡ ମଧ୍ୟ କାମ କଲା ନାହିଁ। ନିଜ ଶରୀରକୁ ସୁସ୍ଥ କରିବା ପାଇଁ ଅନେକ ଚିକିତ୍ସା ସହାୟତା ନେଇଥିଲେ। ତାଙ୍କର ଏହି ପ୍ରୟାସ ଫଳ ଦେଇଥିଲା ଏବଂ ୨୦୧୯ ରେ ସୁସ୍ମିତା ସେନ୍ ଏହି ରୋଗରୁ ମୁକ୍ତି ପାଇଥିଲେ।
