ନୂଆଦିଲ୍ଲୀ: ଏଣିକି ବିବାହର ଏକ ବର୍ଷ ମଧ୍ୟରେ ଛାଡ଼ପତ୍ର ଦେଇପାରିବେନି ଦମ୍ପତି । ଏମିତିକି ଛାଡ଼ପତ୍ର ପାଇଁ ଆବେଦନ ମଧ୍ୟ କରିପାରିବେନି ଦମ୍ପତି । ଏପରି ରାୟ ଶୁଣାଇଛନ୍ତି ଆଲ୍ଲାହାବାଦ ହାଇକୋର୍ଟ ।
ହିନ୍ଦୁ ପରମ୍ପରା ଅନୁଯାୟୀ ବିବାହ ହେଉଛି ପବିତ୍ର ସମ୍ପର୍କ । ହିନ୍ଦୁ ବିବାହ ଆଇନ ଅନୁଯାୟୀ ବ୍ୟବସ୍ଥିତ ଅସାଧାରଣ କଷ୍ଟ କିମ୍ବା ବଡ଼ ଠକାମିର ଶିକାର ନ ହେଲେ ବିବାହର ଗୋଟିଏ ବର୍ଷ ମଧ୍ୟରେ ଏହାକୁ ଭାଙ୍ଗି ଦିଆଯାଇପାରିବ ନାହିଁ। ବିଚାରପତି ଅଶ୍ୱନୀ କୁମାର ମିଶ୍ର ଏବଂ ବିଚାରପତି ଡୋନାଡି ରମେଶଙ୍କୁ ନେଇ ଗଠିତ ଏକ ଡବଲ-ଜଜ୍ ଖଣ୍ଡପୀଠ କହିଛନ୍ତି ଯେ, ଧାରା ୧୪ ଅନୁଯାୟୀ ବିବାହ ତାରିଖରୁ ଏକ ବର୍ଷ ପର୍ଯ୍ୟନ୍ତ ଛାଡପତ୍ର ପାଇଁ ଆବେଦନ କରାଯାଇ ପାରିବ ନାହିଁ । ଯଦି କୌଣସି ଅସାଧାରଣ କଷ୍ଟ କିମ୍ବା ବ୍ୟତିକ୍ରମ ନ ଥାଏ ତେବେ ଏପରି ଆବେଦନ ଗ୍ରହଣ କରାଯାଇପାରିବ।
ନିଶାନ୍ତ ଭରଦ୍ୱାଜ ଏବଂ ଋଷିକା ଗୌତମ ହିନ୍ଦୁ ବିବାହ ଆଇନ, ୧୯୫୫ ର ଧାରା ୧୩-ବି ଅନୁଯାୟୀ ପାରସ୍ପରିକ ବିବାହ ବିଚ୍ଛେଦ ପାଇଁ ଆବେଦନ କରିଥିଲେ। ତେବେ, ଆଇନର ଧାରା ୧୪ ଅନୁଯାୟୀ ପ୍ରଦାନ କରାଯାଇଥିବା ଆବେଦନ ଦାଖଲ କରିବାର ସର୍ବନିମ୍ନ ସମୟ ଅତିକ୍ରମ ହୋଇ ନ ଥିବା ଆଧାରରେ ସହାରନପୁର ଫ୍ୟାମିଲି ଅଦାଲତର ପ୍ରମୁଖ ବିଚାରପତି ଏହାକୁ ଖାରଜ କରିଦେଇଥିଲେ। ଜାନୁୟାରୀ ୧୫ ତାରିଖରେ ତାଙ୍କ ରାୟରେ, ଡିଭିଜନ ବେଞ୍ଚ ଭରଦ୍ୱାଜଙ୍କ ଦ୍ୱାରା ଫ୍ୟାମିଲି କୋର୍ଟର ଆଦେଶକୁ ଚ୍ୟାଲେଞ୍ଜ କରି ଦାଖଲ କରାଯାଇଥିବା ପ୍ରଥମ ଆବେଦନକୁ ଖାରଜ କରିଦେଇଥିଲେ । ଏକ ବର୍ଷ ଅବଧି ସମାପ୍ତ ହେବା ପରେ ଉଭୟ ପକ୍ଷଙ୍କୁ ନୂତନ ଆବେଦନ ଦାଖଲ କରିବାକୁ କହିଥିଲେ।
