ନୂଆଦିଲ୍ଲୀ: ତାଜମହଲ.. ଏହା ଦେଖିବାକୁ ଯେତିକି ସୁନ୍ଦର ଏହାର କାହାଣୀ ମଧ୍ୟ ତାଠାରୁ ଅଧିକ ସୁନ୍ଦର । ଏହା ହେଉଛି ପ୍ରେମ ଏବଂ ଭଲ ପାଇବାର ପ୍ରତୀକ । ଯମୁନା ନଦୀ କୂଳରେ ପତ୍ନୀଙ୍କ ସ୍ମୃତିରେ ତିଆରୀ ହୋଇଥିଲା ତାଜମହଲ । ମୋଗଲ ବାଦଶାହା ଶାହାଜାହାନ ପତ୍ନୀ ମୁମତାଜଙ୍କ ସ୍ମୃତିରେ ବନାଇଛନ୍ତି ତାଜମହଲ। ତାଜମହଲ ଧଳା ପଥରରେ ନିର୍ମିିତ । ସମସ୍ତଙ୍କୁ ଧଳା ଦେଖାଯାଉଥିବା ତାଜମହଲର ରଙ୍ଗ ପରିବର୍ତ୍ତନ ହୁଏ । କାହିଁକି ବଦଳେ ତାଜମହଲର ରଙ୍ଗ । ଏହା ପଛରେ କ’ଣ ରହିଛି କାରଣ, ଆସନ୍ତୁ ଜାଣିବା।
କୁହାଯାଏ ଯେ ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ସହିତ ତାଜମହଲର ରଙ୍ଗ ବଦଳିଯାଏ। ତାଜମହଲର ମୁଖ୍ୟ ଅଂଶ ମାର୍ବଲରେ ନିର୍ମିତ। ମାର୍ବଲ ହେଉଛି ଏକ ସ୍ୱଚ୍ଛ ପଥର ଯାହା ଆଲୋକକୁ ଅବଶୋଷଣ କରେ ଏବଂ ଏହାକୁ ପୁନର୍ବାର ପ୍ରତିଫଳିତ କରେ। ସୂର୍ଯ୍ୟ କିରଣର ବିଭିନ୍ନ କିରଣ ମାର୍ବଲକୁ ଭେଦ କରେ ଏବଂ ବିଭିନ୍ନ ରଙ୍ଗରେ ପ୍ରତିଫଳିତ ହୁଏ। ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ସମୟରେ ସୂର୍ଯ୍ୟକିରଣ ସିଧାସଳଖ ତାଜମହଲ ଉପରେ ପଡେ । ଏହି ସମୟରେ ସୂର୍ଯ୍ୟକିରଣ ଦୁର୍ବଳ ଏବଂ ଏଥିରେ ଅଧିକ ନାଲି, କମଳା ଏବଂ ଗୋଲାପୀ ରଙ୍ଗର ରଶ୍ମି ଥାଏ। ଏହି କିରଣ ମାର୍ବଲ ସହିତ ଧକ୍କା ହୋଇ ତାଜମହଲକୁ ଗୋଲାପୀ, ସୁବର୍ଣ୍ଣ କିମ୍ବା ବାଇଗଣୀ ରଙ୍ଗରେ ପରିଣତ କରେ।
ତାଜମହଲର ରଙ୍ଗ ପରିବର୍ତ୍ତନ କରିବା ମଧ୍ୟ ପର୍ଯ୍ୟଟକଙ୍କ ଦର୍ଶନ ଉପରେ କିଛି ପରିମାଣରେ ନିର୍ଭର କରେ। ବିଭିନ୍ନ କୋଣରୁ ଦେଖା ଯିବାବେଳେ ତାଜମହଲର ରଙ୍ଗ ଭିନ୍ନ ଦେଖାଯାଏ। ଏହା ବ୍ୟତୀତ ପରିବେଶରେ ଥିବା ଧୂଳି, ଧୂଆଁ ଏବଂ ଆର୍ଦ୍ରତା ମଧ୍ୟ ତାଜମହଲର ରଙ୍ଗ ଉପରେ ପ୍ରଭାବ ପକାଇଥାଏ। ବାସ୍ତବତା ହେଉଛି ତାଜମହଲର ରଙ୍ଗ ପ୍ରକୃତରେ ବଦଳିଥାଏ, କିନ୍ତୁ ଏହା ସ୍ଥାୟୀ ନୁହେଁ। ତାଜମହଲର ରଙ୍ଗ ସୂର୍ଯ୍ୟକିରଣର ଅବସ୍ଥା ଅନୁଯାୟୀ କ୍ରମାଗତ ଭାବେ ବଦଳେ।
