ନୂଆଦିଲ୍ଲୀ:ଐତିହାସିକ ମହାକୁମ୍ଭ ୨୦୨୫ ଶେଷ ହୋଇଛି । ଜାନୁଆରୀ ୧୩ ତାରିଖରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ୪୫ ଦିନ ଧରି ଚାଲିଥିଲା। ଯେଉଁଥିରେ ୬୫ କୋଟିରୁ ଅଧିକ ଶ୍ରଦ୍ଧାଳୁ ଉତ୍ତର ପ୍ରଦେଶର ପ୍ରୟାଗରାଜରେ ଗଙ୍ଗା ନଦୀରେ ପବିତ୍ର ବୁଡ଼ ପକାଇଥିଲେ। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କ ପାଇଁ, ଏହି ମେଗା ଇଭେଣ୍ଟରୁ ରାଜ୍ୟକୁ ୧ ଟ୍ରିଲିୟନ ଡଲାର ଅର୍ଥନୀତି ପଥରେ ଆଣିବାର ଏକ ବଡ଼ ସୁଯୋଗ ଥିଲା। ମହାକୁମ୍ଭର ପରିମାଣ ଏବଂ ରାଜ୍ୟ ଅର୍ଥନୀତି ଉପରେ ଏହାର ପ୍ରଭାବ ବିଷୟରେ କହିବାକୁ ଯାଇ ଯୋଗୀ କହିଛନ୍ତି, “ଆଜି ବିଶ୍ୱ ଉତ୍ତର ପ୍ରଦେଶର ଯେଉଁ ସମ୍ଭାବନା ଦେଖୁଛି, ତାହାକୁ ମହାକୁମ୍ଭ ମେଳା ସହିତ ଯୋଡା ଯାଇପାରିବ। କେବଳ ମହାକୁମ୍ଭ ହିଁ ୟୁପିର ଅର୍ଥନୀତିକୁ ୩ ଲକ୍ଷ କୋଟି ଟଙ୍କାରୁ ଅଧିକ ବୃଦ୍ଧି କରିବାରେ ସାହାଯ୍ୟ କରିବ।”
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆକଳନ କରିଛନ୍ତି ଯେ ମହାକୁମ୍ଭ ୨୦୨୫ ରାଜ୍ୟର ଅର୍ଥନୀତିରେ ୩ ଲକ୍ଷ କୋଟି ଟଙ୍କାରୁ ଅଧିକ ଯୋଗଦାନ ଦେବ। ଶିଳ୍ପ ସଂଗଠନ କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ ଅନୁଯାୟୀ, ବିଭିନ୍ନ କ୍ଷେତ୍ରର ଉଦ୍ୟୋଗୀମାନେ ଏହି ମହାନ ଆଧ୍ୟାତ୍ମିକ ସମାବେଶରେ ସାମିଲ ହୋଇଛନ୍ତି, ସେମାନେ ୨ ଲକ୍ଷ କୋଟି ଟଙ୍କାର ବ୍ୟବସାୟ ସୁଯୋଗକୁ ଆଖି ଆଗରେ ରଖିଛନ୍ତି। ଟେକ ଷ୍ଟାର୍ଟ-ଅପ ଏବଂ ଫିନଟେକ କ୍ଷେତ୍ରର ପ୍ରମୁଖ ଖେଳାଳିମାନେ ସେମାନଙ୍କର ବଜାର ଉପସ୍ଥିତିକୁ ବିସ୍ତାର କରିବା ପାଇଁ ଏହି ସୁଯୋଗର ସଦୁପଯୋଗ କରୁଛନ୍ତି।
ରିପୋର୍ଟ ଅନୁସାରେ ଚଳିତ କୁମ୍ଭମେଳାରେ ରାଜସ୍ୱରେ ବିପୁଳ ଅଭିବୃଦ୍ଧି ଦେଖିବାକୁ ମିଳିଛି। ୨୦୧୩ ମସିହାରେ, ସରକାର ୧,୦୧୭ କୋଟି ଟଙ୍କା ଖର୍ଚ୍ଚ ବଦଳରେ ୧୨,୦୦୦ କୋଟି ଟଙ୍କା ରୋଜଗାର କରିଥିଲେ। ୨୦୧୯ରେ ୨,୧୧୨ କୋଟି ଟଙ୍କା ଖର୍ଚ୍ଚ କରାଯାଇଥିଲା ଏବଂ ଏଥିରେ ୧.୨ ଲକ୍ଷ କୋଟି ରାଜସ୍ୱ ବୃଦ୍ଧି ପାଇଥିଲା। ୨୦୨୫ ମହାକୁମ୍ଭ ପାଇଁ ସରକାର ୭,୫୦୦ କୋଟି ଟଙ୍କାରୁ ଅଧିକ ବ୍ୟୟ ବରାଦ କରିଛନ୍ତି, ଯାହା ୨ ଲକ୍ଷ କୋଟି ଟଙ୍କାର ବିପୁଳ ରାଜସୱ ସୃଷ୍ଟି କରିବ ବୋଲି ଆଶା କରାଯାଉଛି, ଯାହା ଏହାକୁ ଇତିହାସର ସବୁଠାରୁ ଆôର୍ଥକ ପ୍ରଭାବଶାଳୀ ଧାର୍ମିକ ସମାବେଶ ମଧ୍ୟରୁ ଗୋଟିଏ କରିବ।
